Jono aty Alaotra: Voarara mandritra ny roa volana

  • jeudi, 08 octobre 2020 22:21
  • Sary nindramina

Voarara manomboka ny faha-25 oktobra ho avy izao, ka hatramin’ny faha-22 desambra ny asa fanjonoana aty Alaotra-Mangoro.

Ny alarobia faha-23 desambra indray ny mpanjono aty an-toerana vao afaka miverina amin’ny asany mahazatra. Efa avo rahateo ny rano no sady efa mafotaka ihany koa ny asa an-tanimbary amin’izay fotoana izay.

Mba hahatsara ny vokatra no anton’ny fepetra, hoy ny solontenan’ny minisitera tompon'andraikitra aty Ambatondrazaka.

Ny fitsinjovana ny ampitso no ao ambadiky ny fanakatonana ny rano isan-taona.
Fotoana fanatodizan’ny karazan-trondro ny vanim-potoana mafana toy izao.

Tsy te-hahalala anefa ny mpihaza sy ny mpihinana fa dia am-bilany sy am-bilia ary an-tsotro avokoa izay azo.
Ho tapitra ringana vetivety, noho izany, ny karazan-trondro raha tsy misy fiatoana kely ny fotoam-pihazana isan-taona.

Velon-taraina ireo mpivelona amin’ny sehatra ny lalam-pihariana jono aty Alaotra eo anatrehan’ny fepetra izay efa mahazatra isan-taona.

Mangataka ny fanafohezana ho iray volana ny fotoana fandraràna ny jono izy ireo. Mahatsiaro ho voa mafy toy ny olon-drehetra noho ny fepetra ara-pahasalamana izy ireo, koa ny jono no heveriny fa fomba hahitam-bola haingana amin’izao.

Nanamafy anefa ny tompon'andraikitry ny minisitera fa tokony ho efa-bolana ny fotoana fanakatonana ny jono, raha ny fepetra ara-teknika no jerena.

Tsetratsetra tsy aritra kely, indray taona dia nisy raim-pianakaviana voatana am-ponja taty Ambatondrazaka satria tratra nanjono nandritra ny fotoana voarara. Mbola trondro ihany koa anefa ny laoka miaraka amin’ny vary naterim-badiny ho azy.

Balita Raharisoa

 

Laissez un commentaire
Assurez-vous d'indiquer les informations obligatoires (*).
Le code HTML n'est pas autorisé.