Nihaona tamin’ireo Ampanjaka, raiamandreny amin’ny fiaraha-monina sy ireo manampahefana avy amin’ny Distrikan’i Mananjary, Ifanadiana, Nosy Varika, Manakara, Vohipeno ary Ikongo ny filoham-pirenena Andry Rajoelina.

Finaonana natao tao Vodirano Manakara ny sabotsy 10 oktobra 2020.

Votoatin’ny fihaonana sy dinika ny amin’ny hizarana ho roa ny faritra Vatovavy Fitovinany.
Fizarana momba ny fitantanan-draharaham-panjakana no atao, hanatsara ny fitsinjaram-pahefana sy hanala ny fahasahiranan’ny mponina amin’ny fivezivezena momba ireo taratasim-panjakana fa tsy fizaram-poko na fampisaraham-bazana, hoy i Andry Rajoelina.

Natao zara mitovy ka hanana Distrika telo avy ny faritra Vatovavy sy ny faritra Fitovinany. Nosy Varika, Mananjary, Ifanadiana no handrafitra ny Faritra Vatovavy ; ary Manakara, Vohipeno sy Ikongo no ho Faritra Fitovinany.

Voalaza araka ny tati-baovao fa « niray feo, niombon-kevitra amin’io fizarana io ireo Ampanjaka taranaka Ndrenony efatra mirahalahy avy any Ikongo sy ireo olom-boafidy aty an-toerana ».

Taorian'ny dinika dia nisy ny fifampizarana ny nofon-kena mitam-pihavanana araka ny fanao nentim-paharazana ao amin’ny faritra Vatovavy Fitovinany.