Nindaosin’ny fahafatesana androany sabotsy 11 jolay tao Ambanja i Donty Jean-Baptiste. Nanao fanambaràna manamafy io vaovao io ny filohan’ny FITEFA (Fikambanan'ny teraky ny faritany Antsiranana), Bekasy Johnfrince.

Nodimandry ny zoma 10 jolay 2020 teo amin’ny faha-51 taonany i Benoît Vonthron, lefitry solontenan’ny Unicef eto Madagasikara.

Namoy ny ainy ny talata 7 jolay 2020 i Rakotomalala Lucien, solombavambahoaka IRD voafidy tao amin’ny Distrika Morombe, Faritra Atsimo Andrefana. Nanana areti-mitaiza sohika ity parlemantera ity. Tao amin’ny Hopitaly Miaramila Soavinandriana no nitsaboana azy. Talohan’ny nifaranan’ny fotoam-pivoriana ara-potoana ny Antenimieram-pirenena izy no efa tsy salama, ary tsy tonga niatrika fivoriana intsony.

Nandritra ny resaka nataony tamin’ny fahitalavitra, androany talata 7 jolay, no nilazan’ny filoha breziliana Jair Bolsonaro fa mitondra ny tsimokaretina Covid-19 izy taorian’ny fitiliana natao azy rehefa nisy fambaran’aretina niseho taminy ; nafana hoditra.

Nahazo fahafahana vonjimaika ary nivoaka androany ny fonjan’Antanimora nitazomana azy telo volana nanomboka ny 2 aprily 2020 i Ny Rado Rafalimanana, filohan’ny ONG Ny Fanahy no maha olona.

Nindaosin’ny fahafatesana ny alakamisy 2 jolay 2020 atoandro teny amin’ny trano fonenany eny Vontovorona Antananarivo Atsimondrano, ny jeneraly zandary misotro ronono Rabotoarison Charles Sylvain. Izy dia efa minisitra in-droa, nisahana ny Ati-tany, efa tao amin’ny Tontolo iainana ihany koa, efa Komandin'ny Zandarimariam-pirenena, ary Senatera izy tamin'ny 2007.

Nindaosin’ny fahafatesana ny hariva teo i Dr Emmanuel Rakotovahiny rehefa nolazoin’ny aretina fotoana lavalava ary notsaboina teny amin’ny klinika tsy miankina iray teny Ilafy teny.

Mitombo hatrany ireo service voakasiky ny Covid-19 ao amin'ny hopitaly CHU Joseph Ravoahangy Andrianavalona. Raha voatery nakatona mihitsy ny Toeram-pandidiana, dia tratra ihany koa ny Laboratoires, ary amin'izao dia misy mpiasan'ny toerana Vonjy aina famelomana, service Réanimation no tratra.

Tontosa androany talata 30 jona 2020 teny amin’ny CCI Ivato ny fifidianana nataon’ireo Solombavambahoaka izay ho solontenan’ny Antenimieram-pirenena eo anivon’ny CENI.

Tamin'ny herinandro lasa teo dia nakatona mihitsy ny Bloc Operatoire n'ny Hopitaly HJRA noho ny valanaretina Covid-19 nahazo ireo mpiasa tsy ampy fitaovana fiarovana.