Vaovao

    • mercredi, 20 janvier 2021 18:50
    • Sary Gasypatriote Antsirabe

    Ambano-Antsirabe II : Vehivavy iray maty tsy tra-drano voahitsaky ny kubota

    Vehivavy iray manodidina ny 35 taona any ho any no maty voahitsaky ny kubota tamin'iny lalàna mihazo an'Ambano iny. Raha ny fanazavana azo dia samy hizotra hihazo an'Antsirabe, na ilay vehivavy, na ilay kubota, saingy nisy bisikileta iray nifanena ka nandona ilay ramatoa nitaingina biskileta hafa ka nampianjera azy tao ambanin'ilay kubota, ary naha voahitsaka ny lohany. Novonjen'ny olona nentina nihazo ny mpitsabo ihany ilay ramatoa saingy tsy tana ny ainy. Efa eo am-panaovana fanadihadiana ny mpitandro filaminana amin'izao fotoana. Mahazo vahana aty Antsirabe amin'izao fotoana ity karazam-pitanterana kubota ity amin'ny fitaomana biriky, ary olana ho azy ireo ny tsy fahafehezana ny lalanan'ny fifamoivoizana. (Jereo Sary Tohiny)  
    Lire la suite ...
    • mercredi, 20 janvier 2021 18:02

    Taom-pambolen-kazo 2021 : Nosantarina tamin’ny famerenana amin'ny laoniny ny alan'i Tsitongambarika

    Fanokafana amin'ny fomba ofisialy ny Taom-pambolen-kazo 2021 tao Manatantely, Taolagnaro, ny talata 19 janoary 2021 nanamarika ny faharoa taona nandraisan’i Andry Rajoelina ny fitarihana sy fitantanana ny Repoblikan'i Madagasikara. Tendrombohitra avo dia avo no niakarana, nambolena zanakazo miisa 6 000 fototra ho fanombohana ny asa fanarenana amin'ny laoniny ny alan'i Tsitongambarika, potika noho ny fandripahana sy ny fandorana ny ala. Ny alan'i Tsitongambarika no misy ireo loharano mamatsy rano an'i Taolagnaro sy lay « cascade » Manatantely izay efa nanomboka nihena be ihany koa. "Mila miara-mientana isika Malagasy rehetra hanatanterahana ny vina « Madagasikara rakotr’ala ». Ary tsy ampy ny manatsato-kazo fa mila fanaraha-maso sy fikolokoloana ary fiarovana ny hazo volentsika mba tena ho tonga ala", hoy ny Filoham-pirenena. Ny Ministeran'ny Tontolo iainana sy ny Fandrosoana Lovainjafy dia manohy ny ezaka natomboka tamin'ny 2020, ary nampitombo ho 75 000 ha ny velarana horakofana ala amin'ity 2021 ity.  
    Lire la suite ...
    • mardi, 19 janvier 2021 13:11
    • Sary ZP

    Toamasina : Ravan’ny zandary ny tambazotra mpanaparitaka vola sandoka

    Jiolahy mpanao sy mpisera vola sandoka miisa 6 sy ramatoa roa no voasambotry zandary tao antampon-tanàn'i Toamasina ny 18 janoary 2021. Efa amam-bolana maro no niasan’ity tambazotran-jiolahy mpanao sy manaparitaka vola sandoka ity tamin'iny faritra Antsinanana iny vao izao sarona izao. Teo Barikadimy no sarona ny iray tamin'ireo jiolahy niaraka tamin'ny lelavola sandoka 20 000 Ariary miisa 750 izay mitotaly 15 000 000 Ariary. Taorian'ny famotorana azy no nanaborahany ireo mpiray tambazotra aminy, ka vehivavy roa sy jiolahy dimy hafa no voasambotra tsirairay tamin'ny toerana samihafa tao Toamasina. Anatin’ny famotorana azy ireo ny Zandarimaria amin’izao. (Jereo Sary Tohiny)
    Lire la suite ...
    • mardi, 19 janvier 2021 13:10
    • Sary : Polisim-pirenena

    Tarandy – Amboasary Atsimo : Polisy miisa roa naratra mafy voan'ny balan'ireo dahalo

    Nisy fanafihan-dahalo nitranga tao Tarandy Kaominina ambonivohitra Amboasary Atsimo omaly Alatsinainy 18 janoary 2021. Nidina ifotony avy hatrany ny Polisy ao Amboasary Atsimo vao nahazo antso avy amin'ny Fokonolona. Dahalo anefa no nitsena sy nanao tifitra variraraka azy ireo. Polisy roa no naratra mafy vokatr'izay, ka ny iray voan'ny bala teo ambanin'ny fony, ary ny iray hafa kosa dia nivoaka teo amin'ny lamosiny ny bala. Tonga tany an-toerana ny Minisitry ny fiarovam-pirenena sy ny Minisitry ny filaminam-bahoaka nijery sy nikarakara ireo Polisy naratra, ary nanome baiko hisambotra faran'izay malaky ireo dahalo ireo. (Jereo Sary Tohiny)  
    Lire la suite ...
    • lundi, 18 janvier 2021 11:01
    • Sary Gasypatriote Antsirabe

    Ampihaviana-Antsirabe : Potika ilay fiara kely 205 GTI, vokatry ny fandehanana mafy

    Fiara Peugeot 205 GTI iray no nifatratra tamin’ny andrin’ireny tambazotram-pifandraisana ireny ny alin’ny sabotsy hifoha ny alahady tokony ho tamin’ny 2 maraina tany ho any, teo Ampihaviana-Antsirabe. Mafy ny dona ka nipitika any amin’ny 15 metatra any ilay fiara kely ary nivadibadika raha ny fahitana ny fahavoazana aminy. Naratra mafy avokoa ireo olona tao anatiny raha ny filazan’ireo nanatri-maso, saingy tsy voafaritra mazava ny isany. Mpitari-posy iray no nijoro vavolombelona fa hitany nivezivezy eran’Antsirabe ity fiarakely ity nanomboka tany amin’ny 11 ora alina tany ny sabotsy, ka lehilahy rasta no namily ny fiara niaraka tamina vehivavy vitsivitsy tao anatiny.  
    Lire la suite ...
    • samedi, 16 janvier 2021 19:21

    Gadra nitsoaka ny fonjan’i Farafangana : Voasambotra i Marolahy, dimy volana taty aoriana

    Voasambotry ny Zandary avy ao amin’ny « Poste Fixe » Anosivelo, Distrikan’i Farafangana, nandritra ny fisafoana nataon’izy ireo, ny harivan’ny alarobia 13 janoary 2021, i Marolahy. Iray tamin’ireo voafonja niisa 88 nitsoaka nandritra ny fahavakisan’ny fonjan’i Farafangana ny alahady 23 aogositra 2020 ity farany. Halatra vola 670 000 Ar narahina herisetra no nidiran’i Marolahy ny fonjan’i Farafangana ny 29 desambra 2018. Notsaraina izy ny 03 jolay 2019 ary voaheloka higadra an-tranomaizina dimy taona sazy mihatra. Natolotra ny fampanoavana ny Fitsarana ambaratonga voalohany Farafangana i Marolahy, ny 15 janoary 2021, ary naverina am-ponja. Mbola misy 16 ireo voafonja karohina amin’izao. Nampanantena valisoa 2 tapitrisa Ariary isaky ny gadra voasambotra moa ny fanjakana, ho an’izay olona manome loharanom-baovao ahazoana misambotra ireo voafonja nitsoaka ireo.  
    Lire la suite ...
    • vendredi, 15 janvier 2021 11:31
    • Sary : Rainer Dolch

    Betsiaka : Mangataka hitrandraka volamena ny mponina

    Ny 8 janoary lasa teo no nanatanteraka fivoriam-be farany narahina fanaovan-tsonia ny mponina any Betsiaka Ambilobe. Mangataka amin’ny fanjakana sy ny ONG Fanamby izy ireo hitrandraka volamena any amin’ny toerana tsy lavitry ny faritra arovana Andrafiamena Andavakoera. Tany mangadihady izy io, fa ny ala fady izay ao anatin’ny faritra arovana tantanin’ny ONG Fanamby kosa dia eo amin’ny 500 metatra miala eo no misy azy. Manankarena zavamaniry sy biby tsy fahita firy izany ala izany ka mahasarotiny ny fitondrana ny fiarovana azy.Nirongatra be ny fitrandrahana volemana manakaiky izany faritra arovana izany ny volana desambra teo.An-jatony aman’arivony ny mpitrandraka madinika nirohotra tany. Nandefa miaramila sy zandary ary polisy ny fitondram-panjakana nandroaka azy ireo.
    Lire la suite ...
    • vendredi, 15 janvier 2021 09:48

    Mpifindra monina : Mpandeha niisa 285 najanon'ny fiara nitondra azy ireo teo Kelivondraka

    Mpifindra monina avy any Amboasary Atsimo sy Ambovombe Androy mitotaly 285, nahitana ankizy 75, vehivavy 42, lehilahy 168, no tafajanona teo Kelivondraka, amin'ny sampanan'ny RN13 sy RN7 ny 12 janoary 2021 teo. Nandositra ny haintany sy hanoanana any atsimo izy ireo, ka najanon'ny fiara nitondra azy ireo teo, fa hafindra amina fiara hafa. Nandray andraikitra ho fanampiana azy ireo ny Goverinoran'ny faritra Ihorombe, niaraka tamin'ny Talem-paritry ny mponina, ny lehiben'ny Zandary tao an-toerana nanolotra sakafo miampy ny trano lay iray lehibe an'ny BNGRC nialofan’izy ireo. Afaka niainga ny 13 janoary 2021 folak'andro ny ampahany voalohany, ary omaly atoandro no niainga tao Ihosy ny 130 andiany farany tamin'izy ireo hiazo an’Antananarivo. Nanambara ny Governora fa tsy azo ekena intsony ny fanaovana “transbordement” toy izao ao Ihorombe, fa tsy maintsy ataon'ireo mpitatitra tonga hatrany any amin'izay toerana hitodiany ny mpandeha entiny, mba hitandrovana ny fahasalamana sy ny fandriampahalemana.  
    Lire la suite ...
    • vendredi, 15 janvier 2021 09:01
    • Sary nindramina

    Amparafana-Mahanoro : Velaran’ala 35 Ha no may

    Velaran-tany 35 ha no may tao amin'ny alan'Amparafana, Distrikan'i Mahanoro ny alarobia teo. Niara-nientana tamin'ny famonoana ny afo ny Fokonolona, ireo mpitandro ny filaminana, ireo tompon'andraikitra ao an-toerana ary ny ekipan'ny lehiben'Ala ao Mahanoro. Efa miroso amin'ny fanadihadiana mahakasika ity fahamaizana ity ireo tompon'andraikitra ankehitriny. (Jereo Sary Tohiny)
    Lire la suite ...
    • lundi, 11 janvier 2021 20:18

    Antsanga-Antsirabe : Jiolahy nirongo basy nanafika trano fivarotana, olona roa no naratra mafy

    Tsy mandry fahalemana eto Antsirabe tato ho ato na misy aza ny ezaka ataon’ny mpitandro filaminana, saingy tsy mahasehaka izany izy ireo. Nisehoana fanafihana mitam-basy teny amin’ny Fokontany Antsanga-Ambohimanabe, eto Antsirabe ambonivohitra ny alin’ny alahady teo. Vola 20 tapitrisa no lasan’ireo jiolahy, ary olona 4 no nodarohan’izy ireo, ka ny 2 no tena naratra mafy. Toeram-pivarotana zava-pisotro, manamorona ny làlam-pirenena faha 34 mivoaka an’Antsirabe, akaiky an’Andraikiba ity voatafika ity. Raha ny fanazavana azo avy any an-toerana, dia tokony ho tamin’ny 8 ora sy sasany alina no tonga ireto andian-jiolahy ireto. Mbola nisy olona nisotro teo amin’io toerana io tamin’izany, fa tsy nisy nanam-po mihitsy kosa, fa ireo jiolahy efa teo am-pivarotana toy ny mpanjifa rehetra. Tampoka nefa dia nanapoaka basy ny iray tamin’izy ireo, ary teo vao samy taitra ny rehetra, satria noheverina ho olona mpanjifa ihany ireto jiolahy ireto.
    Lire la suite ...
Page 1 sur 220